Hlaupanámskeið Absolute Training X Movement Health

Hlaupanámskeið Absolute Training X Movement Health

Regular price
18.990 kr
Sale price
16.990 kr
Tax included.

Hlaupanámskeið Absolute Training og Movement Health

Fjarnámskeið með einni sameiginlegri hlaupaæfingu í viku. Alla mánudaga kl.17:15.

Getuskipt einstaklingsmiðað hlaupanámskeið. Fyrir algjöra byrjendur og lengra komna. 3x 4vikna námskeið þar sem stefna er sett á Reykjavíkurmaraþon, hvort sem markmiðið er að njóta þess að stunda útivist í fallegri náttúru, ná að hlaupa 10 km í fyrsta skipti eða bæta tímann sinn í 10 eða 21km. Markmið námskeiðsins er að þátttakendur njóti þess að hlaupa, á skynsaman og markvissan hátt með stigvaxandi álagi. Þátttakendur fá æfingar (styrkjandi og liðkandi) til að bæta hreyfigetu sína með það að marki að fyrirbyggja meiðsli og auka hlaupagetu, sem og æfingar til að auka styrk og þol. Þátttakendur fá 3 æfingar í viku til að vinna í markmiðasetningu og andlegu hliðinni, sem er undirstaðan í þjálfun Absolute Training. Með námskeiðinu eiga þátttakendur að fá viðeigandi æfingar sem styðja við markmið þeirra ásamt því að vera hluti af hóp sem stefnir í sömu átt. Markmiðið er að mynda samheldinn hvetjandi hóp sem hittist a.m.k einu sinni í viku og fagnar svo saman í lok Reykjavíkurmaraþons.

Lára; “Síðasta sumar fann ég áhuga frá mörgum sem langaði að taka þátt í Reykjavíkurmaraþoninu en þorðu ekki að taka skrefið. Þeir vissu ekki hvernig þeir ættu að æfa sig og töldu sig hreinlega ekki geta hlaupið/skokkað/gengið 10 km. Í ár langar mig að hjálpa þessum einstaklingum og öðrum með svipað hugarfar að setja sér markmið gagnvart hlaupum og læra að njóta þeirra á leiðinni. Hlaup á íslenskum sumardegi, í fallegri náttúru með góðum félagsskap, það er fátt betra fyrir líkama og sál" ... "Námskeiðið er líka hugsað fyrir þá sem fara reglulega út að hlaupa og langar að bæta sig, en vantar aðhald og áætlun sem hjálpar þeim á markvissan og árangursríkan hátt að settum markmiðum“      

Valgerður; “Það er algengt að einstaklingar haldi að þeir hafi einfaldlega ekki stoðkerfið í að hlaupa eða hlaup séu ekki fyrir sig því þeir finna snemma fyrir óþægindum þegar þeir eru að byrja og gefast fljótt upp. Við uppsetningu námskeiðsins vildum við þess vegna flétta saman góðri álagsstýringu í hlaupum, styrktarþjálfun og einstaklingsmiðaðri áætlun til að vinna með hreyfanleika hvers og eins svo að hlaupin verði sem ánægjulegust. Að setja sér markmið og vinna í hugarfarinu samhliða því gerir þetta hlaupasumar enn betra og vonandi getum við aðstoðað, þá sem vilja koma sér af stað í hlaupum eða bæta árangur sinn markvisst, með skynsömum og skemmtilegum hætti

Samæfingar í júní fara fram alla mánudaga kl.17:15 og taka u.þ.b 60-90 mínútur. 

Námskeiðið:

  • Þjálfarar námskeiðsins: Lára Hafliðadóttir og Valgerður Tryggvadóttir
  • Byrjar 1.júní
  • Verð: 4 vikur;16.990 kr. 12 vikur; 43.000. (hægt að skipta greiðslum niður á mánuði)
  • 3-4x hlaupaæfingar í viku (fer eftir getustigi og markmiðum).
  • 2-3 fjaræfingar + 1 samæfing á mánudögum kl.17:15 (á höfðuborgarsvæðinu)
  • Einstaklingsmiðað hlaupaplan
  • 2x styrktaræfingar í viku 
  • Prófanir: Sérhæfðar liðkandi og styrkjandi æfingar til að auka hreyfanleika og úthald fyrir hlaup. Prófanir eru leiddar í myndböndum, markviss áætlun sett upp og æfingar fléttast inn í prógrammið.
  • 1x Hreyfiflæði í viku (mobility flæði)
  • 3x Andlegar æfingar í viku
  • Myndbönd með öllum æfingum (líkamlegum og andlegum)
  • Facebook síða og app           
  • Fróðleikur og hvatning

Eftir skráningu fær viðkomandi tölvupóst frá þjálfurum námskeiðsins með frekari upplýsingum um fyrirkomulag, facebook grúppuna og aðgang að appinu. Þá verður viðkomandi beðinn um að fylla út spurningalista sem hlaupaprógram hans verður byggt á ásamt því að áætla getu sína út frá neðangreindum getustigum (level1-3).

Level 1 (10km): Byrjandi í hlaupum, aðili sem hefur aldrei (eða fyrir löngu síðan) hlaupið 10 km. Eða aðili sem hefur ekki verið í styrktar/þolþjálfun undanfarna mánuði. Aðili sem stefnir mögulega að því að hlaupa 10 km í Reykjavíkurmaraþoninu.

Level 2 (10km): Aðili sem hefur verið að hlaupa undanfarnar vikur, telur sig vera í alhliða fínu formi og hefur viðmið um tíma í 5 eða 10km hlaupi og stefnir á 10 km í Reykjavíkurmaraþoni.

Level 3 (21km): Aðili sem hefur verið að hlaupa undanfarnar vikur, telur sig vera í alhliða fínu formi og hefur viðmið um tíma í 5, 10 eða 21 km hlaupi og stefnir á 21km í Reykjavíkurmaraþoni.

Þegar námskeiðið byrjar eru 12 vikur í Reykjavíkurmaraþon. Hvert námskeið er 4 vikur og verða því 3 námskeið fram að maraþoni. Það er óskhyggja okkar (Láru og Valgerðar) að þátttakendur námskeiðsins skrái sig á fyrsta námskeiðið með maraþonið í huga, hvort sem markmið þeirra er að klára 10 km hlaupandi og gangandi eða að bæta tímann sinn í 10 eða 21 km. Þetta námskeið er fyrir alla, en markmiðið er fyrst og fremst að þátttakendur njóti þess að hlaupa og hafi gaman af.